ABŞ, Livan və İsrail təhlükəsizlik səylərini əlaqələndirəcək

ABŞ, Livan və İsrail hərbçilərinin nümayəndələri Pentaqonda keçiriləcək görüşdə hərbi və təhlükəsizlik koordinasiya orqanının yaradılmasını müzakirə edəcəklər.

 

Sfera.az xəbər verir ki, bu barədə Vaşinqtondakı ərəb diplomatik mənbəyi "Əl-Hadath TV"-yə bildirib.

 

"Baş Qərargahın Əməliyyatlar üzrə rəisi, briqada generalı Corc Rizkallahın rəhbərlik etdiyi Livan hərbi nümayəndə heyətinin xahişi ilə atəşkəsin gücləndirilməsi gündəmdəki ilk məsələdir", - deyə o bildirib.

 

Mənbə əlavə edib ki, Livanlılar İranyönlü şiə təşkilatı Hizbullaha qarşı hərbi əməliyyatların intensivliyini azaltmaq üçün İsrailə təzyiq göstərmək məqsədilə ABŞ-nin müdaxiləsinə ümid edirlər.

 

Onun sözlərinə görə, gərginliyin azaldılması çağırışı Pentaqonda keçiriləcək görüşün nəticələrindən biri olacaq.

 

Qeyd edək ki, görüş iyunun 2-3-də Vaşinqtonda keçirilməsi planlaşdırılan Livan-İsrail danışıqlarının dördüncü raundundan əvvəl baş tutacaq./teleqraf