Silvio Berluskoninin 500 milyon avroluq dəbdəbəli malikanəsi – FOTOLAR
İtaliyanın mərhum baş naziri, biznes maqnatı Silvio Berluskoninin Sardiniyadakı 500 milyon avro dəyərində olan möhtəşəm malikanəsi diqqət mərkəzindədir.
Sfera.az bildirir ki, İtaliya siyasətinə 57 yaşında addım atan Berluskoni, Avropa dövlətinin hökumətinə rəhbərlik edən ilk milyarder kimi tarixə düşüb.
O, təkcə siyasətdə deyil, həm də sığorta, bank sektoru və media dünyasında nəhəng bir imperiya qurub.
Berluskoni 1970-ci illərin sonlarında Avropada ilk genişmiqyaslı kommersiya televiziya şəbəkəsini yaradıb. 1986-cı ildən 2016-cı ilə qədər isə tam 30 il ərzində dünya futbolunun nəhənglərindən olan "Milan" klubunun sahibi olub.
"Forbes" jurnalının 2011-ci il reytinqinə əsasən, Berluskoni 7,8 milyard dollar sərvəti ilə dünyanın ən varlı şəxsləri siyahısında 118-ci sırada yer alıb. Onun ən yüksək göstəricisi isə 2005-ci ildə qeydə alınıb. O vaxt 12 milyard dollarlıq sərvəti ilə dünyanın ən varlı 25-ci insanı olub.
2023-cü ilin iyununda vəfat etdiyi zaman isə xalis sərvəti 6,8 milyard dollar ilə 7,6 milyard dollar arasında qiymətləndirilirdi.
Berluskoni İtaliya Respublikası dövründə baş nazir vəzifəsində ən uzun müddət qalan şəxs kimi də rekord vurub. İtaliyanın Krallıq dövrünü də nəzərə aldıqda isə ondan daha çox vəzifədə qalan yalnız Benito Mussolini və Covanni Colitti olub.
Bəsti Rəfizadə
