Dünyanın ən qorxulu yerləri - FOTO
Dünyanın müxtəlif ölkələrində elə məkanlar var ki, həm tarixi hadisələri, həm də sirli və qorxulu hekayələri ilə tanınır. Bu yerlər illərdir insanlarda maraqla yanaşı, müəyyən qədər qorxu da yaradır.
Sfera.az dünyanın ən sirli və qorxulu məkanlarını oxucularına təqdim edir.
Kuklalar adası (Meksika)
Meksikadakı bu tərk edilmiş adada ağaclara və binalara asılmış yüzlərlə köhnə kukla var. Rəvayətə görə, Julian Santana Barrera burada boğulmuş bir qızın xatirəsinə kuklalar toplamağa başlayıb. Zamanla ada tamamilə kuklalarla dolub və qəribə atmosferi ilə tanınıb.
Haşima adası (Yaponiya)
Bir vaxtlar kömür mədəni kimi fəaliyyət göstərən Haşima adası mədənlər bağlandıqdan sonra tamamilə boşalıb. Sürətlə tərk edilən ada bu gün “xəyalət şəhər” kimi tanınır və boş binaları ilə qorxulu görüntü yaradır.
Sümüklər Kapelisi (Portuqaliya)
16-cı əsrdə tikilən bu kilsənin divarları təxminən 5000 rahibin sümükləri ilə örtülüb. Girişdə yazılan “Ölüm doğuşdan yaxşıdır” ifadəsi isə ziyarətçilərə güclü təsir bağışlayır.
Aokigahara meşəsi (Yaponiya)
“İntihar meşəsi” kimi tanınan Aokigahara sıx ağacları və səssiz atmosferi ilə məşhurdur. Uzun illərdir müxtəlif sirli hadisələrlə əlaqələndirilir və Yaponiyanın ən qorxulu yerlərindən biri sayılır.
Paris katakombaları (Fransa)
Paris şəhərinin altında yerləşən bu yeraltı tunellərdə milyonlarla insanın sümükləri saxlanılır. 18-ci əsrdən etibarən burada təxminən 6 milyon insan dəfn edilib və bu katakombalara qorxulu bir şöhrət qazandırıb.
İlan adası (Braziliya)
“İlan adası” kimi tanınan bu ərazi dünyanın ən təhlükəli yerlərindən biridir. Meşə və qayalarla örtülü adada çoxlu zəhərli ilanlar yaşayır və burada insan üçün ciddi təhlükə mövcuddur.
Göründüyü kimi, bu məkanlar həm real tarixi faktlar, həm də əfsanələrlə qarışaraq dünyanın ən qorxulu və ən maraqlı yerləri sırasında göstərilir.
Mənsumə