Messi: Qaçırdığım penaltiyə görə əsəbiləşmişdim

Argentina millisinin hücumçusu Lionel Messi futbol üzrə dünya çempionatlarında ən çox qol vuran oyunçu rekordunu qırmasına münasibət bildirib.

Sfera.az xəbər verir ki, Argentina mətbuatına danışan Messi qeyd edib ki, onun üçün şəxsi rekorddan daha vacib olan komandasının pley-off mərhələsinə yüksəlməsidir.

"Qaçırdığım penaltiyə görə əsəbiləşmişdim. Zərbəm çox uğursuz alındı. Amma xoşbəxtlikdən oyunun gedişatını dəyişə bildik və hesabda önə keçdik. Əgər həmin penaltini vursaydım, bəlkə də sonradan daha iki qol vura bilməzdim. Əsas odur ki, nəticədən, komandanın oyunundan və əzmindən razıyam", - deyə Messi bildirib.

O, Avstriya ilə görüşün gözlənildiyi kimi çətin keçdiyini də vurğulayıb:

"Heç kim qələbəni asanlıqla vermir. Topa uzun müddət nəzarət etmək çətin idi. Gərgin oyun oldu. Əsas məqsədimiz növbəti mərhələyə yüksəlmək idi və buna nail olduq".

Messi dünya çempionatlarında vurduğu qollar arasında ən sevdiyini seçməyin çətin olduğunu da bildirib.

Qeyd edək ki, Argentina millisi Avstriyanı 2:0 hesabı ilə məğlub edərək 1/16 finala vəsiqə qazanıb. Bu görüşdə fərqlənən Lionel Messi dünya çempionatları tarixində vurduğu qolların sayını 18-ə çatdıraraq Almaniya millisinin sabiq hücumçusu Miroslav Klozeni geridə qoyub və mundialların bombardirləri siyahısında yeni rekordun sahibi olub.