29 Aprel Beynəlxalq Rəqs Günüdür

Bu gün dünyada Beynəlxalq Rəqs Günü qeyd olunur.

 

Hər il 29 aprel tarixində keçirilən bu bayram rəqsin bütün janrlarını və formalarını əhatə edir.

 

Sfera.az xəbər verir ki, bu əlamətdar günün tarixi 1982-ci ildən başlayır. UNESCO-nun tərəfdaşı olan Beynəlxalq Teatr İnstitutunun Beynəlxalq Rəqs Komitəsi tərəfindən təsis edilən bu tarix, müasir balet sənətinin banisi hesab olunan fransız xoreoqrafı Jan-Jorj Noverrin ad günü şərəfinə seçilib. Bayramın əsas fəlsəfəsi rəqsi bir sənət forması kimi təbliğ etmək, bütün siyasi, mədəni və etnik sərhədləri aşaraq insanları eyni dil, hərəkətin dili vasitəsilə birləşdirməkdir. Bu günün əsas mesajı rəqs sənətinə ictimaiyyətin diqqətini cəlb etmək və onun insan həyatındakı mənəvi əhəmiyyətini vurğulamaqdır.

 

Azərbaycanda rəqs sənəti qədim tarixə və zəngin ənənələrə malikdir. Qobustan qayalarındakı "Yallı" təsvirlərindən başlayan bu yol, bu gün peşəkar balet və xalq rəqsləri ansambllarımızın beynəlxalq arenalardakı uğurları ilə davam edir. Çünki rəqs sadəcə bədənin hərəkəti deyil, o, bir xalqın tarixini, sevincini və kədərini ifadə edən ən səmimi vasitədir.

 

Hər il olduğu kimi, bu il də Beynəlxalq Rəqs Günü çərçivəsində dünyanın müxtəlif ölkələrində, eləcə də Azərbaycanda rəngarəng çıxışlar, ustad dərsləri və festivalların keçirilməsi nəzərdə tutulub.

 

Bəsti Rəfizadə

Sfera.az