ABŞ-nin müharibə xərcləri açıqlandı - RƏQƏMLƏR

ABŞ-nin İrana qarşı apardığı hərbi əməliyyatlara xərclədiyi vəsaitin məbləği açıqlanıb.

Sfera.az xarici mediaya istinadən xəbər verir ki, ABŞ Prezidenti Donald Tramp administrasiyasının rəsmiləri bu həftə keçirilən brifinqdə müharibənin ilk altı gününün ölkəyə ən azı 11,3 milyard dollara başa gəldiyini bildiriblər.

 

Bu barədə məsələ ilə tanış olan mənbə məlumat verib.

Məlumata görə, senatorlar üçün keçirilən qapalı brifinqdə səsləndirilən bu rəqəm hələlik müharibənin bütün xərclərini əhatə etmir. Sözügedən məbləğ qanunvericilərin münaqişə ilə bağlı daha ətraflı məlumat tələb etməsi fonunda təqdim olunub.

Konqresdə çalışan bir neçə köməkçi bildirib ki, Ağ Ev yaxın vaxtlarda müharibənin davamı üçün əlavə maliyyə ayrılması ilə bağlı Konqresə müraciət edə bilər. Bəzi rəsmilər tələb olunacaq məbləğin 50 milyard dollara qədər ola biləcəyini desə də, digərləri bu rəqəmin daha yüksək olacağını ehtimal edirlər.

Administrasiya hələlik münaqişənin ümumi xərcləri və ya nə qədər davam edəcəyi barədə rəsmi ictimai qiymətləndirmə sənədi təqdim etməyib. Prezident Donald Tramp isə Kentukkiyə səfəri zamanı müharibədən danışarkən ABŞ-nin “qalib gəldiyini”, lakin əməliyyatın tam başa çatdırılması üçün mübarizənin davam edəcəyini vurğulayıb.

Administrasiya rəsmiləri Konqres üzvlərinə bildiriblər ki, hücumların təkcə ilk iki günü ərzində 5,6 milyard dollar dəyərində sursatdan istifadə edilib.
Konqres üzvləri isə müharibənin ABŞ-nin hərbi ehtiyatlarını sürətlə tükəndirə biləcəyindən narahatdırlar. Qeyd olunur ki, müdafiə sənayesi hazırkı yüksək tələbatı qarşılamaqda çətinlik çəkir.

Fidan Hacızadə
Sfera.az