ABŞ-də hökumət qapanması: 10 günlük qeyri-müəyyənlik olacaq

ABŞ Daxili Təhlükəsizlik Departamenti bu həftəsonu fəaliyyətini dayandırıb.

Sfera.az xəbər verir ki, bu barədə "NBC News" məlumat yayıb.

Bu səbəbdən Ağ Ev və Demokrat liderlər federal agentlərin ötən ay Minnesotada iki Amerika vətəndaşını öldürməsindən sonra ABŞ immiqrasiya qanunvericiliyindəki dəyişiklikləri müzakirə etməyə davam edirlər.

Tərəflər təklif mübadiləsini davam etdirir ki, bu da razılığa gəlmək üçün müəyyən ümid verir. Lakin Ağ Evin Demokratların hansı tələbini qəbul edəcəyi hələ də məlum deyil. Konqres cümə axşamı razılığa gəlmədən Vaşinqtonu tərk edib. Departamentin maliyyələşməsi şənbə günü yerli vaxtla saat 12:01-də rəsmi olaraq dayandırılıb. Bu o deməkdir ki, FEMA (Federal Fövqəladə Halların İdarə Edilməsi Agentliyi), Nəqliyyat Təhlükəsizliyi Administrasiyası və Sahil Mühafizəsi kimi agentliklərdəki federal işçilər maaş almayacaqlar. Baxmayaraq ki, onların əksəriyyəti fəaliyyətləri həyati əhəmiyyət kəsb etdiyindən işə getməyə davam edəcəklər.

Tərəflər arasındakı mübahisənin mərkəzində olan İmmiqrasiya və Gömrük Mühafizəsi, eləcə də Gömrük və Sərhəd Mühafizəsi idarələri "qapanma"dan daha az əziyyət çəkəcək. Hər iki qurumun işçilərinin işləməyə və maaş almağa davam etməsi gözlənilir, çünki bu qurumlar Prezident Donald Trampın ötən ilki qanun layihəsinin bir hissəsi kimi təsdiqlənmiş 75 milyard dollarlıq maliyyə vəsaitinə çıxış əldə ediblər.

Nümayəndələr Palatasının və Senatın da 23 fevrala qədər yenidən toplanacağı gözlənilmir ki, bu da Daxili Təhlükəsizlik Departamentinin ən azı 10 gün bağlı qalması ehtimalını artırır. Lakin qanun layihəsi ilə bağlı səsvermə qərarı verilərsə, onlar daha tez geri qayıda bilərlər.

 

Firuzə Əliyeva
Sfera.az