İki polisimizin şəhid olduğu Nardaran: Qara bayraqlardan turizmə dəyişən sima
Bir vaxtlar Bakının ən çox müzakirə olunan qəsəbələrindən biri olan Nardaran bu gün tam fərqli bir mərhələdən keçir. İllər əvvəl müxtəlif radikal çağırışlar, qara bayraqlar və xarici ideoloji təsirlərlə bağlı xəbərlərlə gündəmə gələn qəsəbə artıq başqa bir istiqamətdə – turizm və istirahət məkanı kimi tanınmağa başlayıb.
Sfera.az xəbər verir ki, Nardaran uzun müddət radikal dini qrupların fəaliyyəti və xarici təsir iddiaları ilə bağlı müzakirələrin mərkəzində olub. Belə ki, 2010-cu illərin ortalarında qəsəbənin bəzi küçələrində fars dilində yazılar, müxtəlif dini şüarlar və qara bayraqların görünməsi tez-tez müzakirə edilirdi. Bu görüntülər Nardaranın uzun müddət mediada fərqli və bəzən də gərgin bir imiclə təqdim olunmasına səbəb olmuşdu. Hadisələrin kulminasiya nöqtəsi isə 2015-ci ildə baş verdi. Həmin il polis orqanları tərəfindən qəsəbədə radikal qruplaşmaya qarşı xüsusi əməliyyat keçirildi.
Əməliyyat zamanı silahlı müqavimət göstərən şəxslər zərərsizləşdirildi, bir sıra şəxslər saxlanıldı və qanunsuz silah-sursat aşkar edildi. Əməliyyat zamanı iki polis əməkdaşı həyatını itirdi və onlar dövlət tərəfindən şəhid kimi yad edildi. Həmin hadisə həm də dövlətin radikal qruplara və xarici təsir cəhdlərinə qarşı sərt mövqeyinin nümayişi kimi qiymətləndirildi. Bu əməliyyatdan sonra qəsəbədə radikal təsirlərin qarşısının alınması istiqamətində ardıcıl tədbirlər həyata keçirildi. Nəzarət gücləndirildi, sosial layihələr həyata keçirildi və qəsəbənin inkişafına yönəlmiş yeni proqramlar icra olunmağa başladı.
Bu gün Nardaran haqqında danışanda artıq yalnız keçmişdən deyil, həm də yeni imkanlardan söz açılır. Xəzər sahilində yerləşən qəsəbə turizm potensialı baxımından paytaxtın ən cəlbedici istiqamətlərindən birinə çevrilməkdədir. Son illərdə burada istirahət məkanlarının, villaların və turizm obyektlərinin sayı artıb. Xüsusilə yaxınlıqda yerləşən məşhur kurort layihəsi olan "Sea Breeze Resort" bu dəyişimin simvolu kimi göstərilir. Xəzər sahilində salınan bu iri turizm kompleksi yalnız yerli sakinlər üçün deyil, həm də xarici qonaqlar üçün istirahət və əyləncə məkanı kimi tanınır. Yay mövsümündə sahil boyu istirahətə gələn insanların sayı da ildən-ilə artır.
Dəniz kənarında açılan restoranlar, kafe və çimərlik zonaları Nardaranın artıq fərqli bir həyat ritminə keçdiyini göstərir. Nardaranın bu dəyişimi təkcə təhlükəsizlik tədbirlərinin nəticəsi deyil. İnfrastrukturun yenilənməsi, yolların təmiri, sosial layihələr və turizm investisiyaları qəsəbənin ümumi inkişafına ciddi təsir göstərib. Bir vaxtlar divarlarda görünən siyasi və ideoloji şüarlar artıq gündəlik həyatın mövzusu deyil. Onların yerini daha çox sahil turizmi, yeni tikililər və istirahət mədəniyyəti alır. Bu gün Nardaranın adı çəkiləndə bir çoxları üçün ilk ağla gələn görüntü qara bayraqlar deyil, Xəzər sahilində günəşli çimərliklər, müasir istirahət zonaları və turizm layihələri olur. Beləliklə, illər əvvəl mübahisəli xəbərlərlə gündəmə gələn qəsəbə tədricən yeni imic formalaşdırır - təhlükəsizlik və sabitlik fonunda inkişaf edən sahil məkanı kimi.
Firuzə Əliyeva
Sfera.az